,,ოპოზიცია დეოლიგარქიზაციის კანონპროექტს ბიძინა ივანიშვილის წინააღმდეგ ამზადებს, „ქართული ოცნება“ კეზერაშვილის წინააღმდეგ, ჩვენ რა ვქნათ, უბრალო ხალხმა?” – ამის შესახებ ოპოზიციონერმა დეპუტატმა, იაგო ხვიჩიამ განაცხადა.
მისი თქმით, მიღებული კანონპროექტიდან, არც ერთი არ არის ის, რასაც დასავლეთი ითხოვს.
„მგონია, რომ ჩვენი კოლეგები რაღაცნაირად უნდა დავარწმუნოთ, რომ ერთმანეთის წინააღმდეგ კანონპროექტების მომზადებით შორს ვერ წავალთ და ასე ევროპაში არავინ შეგვიშვებს. ლაპარაკი ჩხუბისა და კონფლიქტის ნაცვლად უნდა ვისწავლოთ. არც ერთი კანონპროექტი ის არ არის, რასაც ჩვენგან დასავლეთი ითხოვს. გვთხოვენ კონსენსუსს და დეპოლარიზაციას. ამის ნაცვლად, ახალ-ახალი კანონპროექტები შემოგვაქვს ახალ-ახალი კონფლიქტების გასაღვივებლად, რაც ყველაზე არაევროპული ქცევაა“,- განაცხადა იაგო ხვიჩიამ.
